ផឹកស្រាតែងកាព្យ កំណាព្យគ្មាននយ័
ចុងជួនខ្លីៗ ស្រដីរ៉ាយរ៉ាប់
រាត្រីចន្រ្ទរះ មិនឈ្នះសាសព្ទ
រឿងគេមិនស្តាប់ ប្រាប់ចោលតាមខ្យល់។

តឹងទ្រូងស្ទើរបែក រហែកជាពីរ
អារម្មណ៍វក់វី មីរតែអំពល់
ខែណាឆ្នាំណា ទើបផុតសោកសល់
រលាយរំបល់ ខ្វល់ចិត្តរងកម្ម។

ស្នេហានៃយើង ផ្តើមឡើងដោយចិត្ត
ចងក្រងជាមិត្ត ស្និទ្ធគ្នារយឆ្នាំ
ចំណងគ្រួសារ មិនដែលប្រេះស្រាំ
ថ្ងៃនេះម្តេចកម្ម ស្រាំចិត្តលែងស្ងប់។

តើខ្ញុំខុសអ្វី ស្រដីបានទេ?
កុំបែរងាករេ ទេសនាបន្លប់
បើអ្នកអស់ចិត្ត ឬអ្នកចង់ក្បត់
ខ្ញុំក៏មិនឃាត់ ព្រាត់ក៏មិនថ្វី។

ទំពក់វារទៅ ទើបព្នៅវារមក
ហេតុផលក្នុងលោក ស្រាក់គ្នារញ៉ៃ
សុភមង្គលត្រូវបានប្រលយ័
ថ្ងៃនេះថ្ងៃថ្មី សូមសិរីកើត។
——————————

ដោយ លឹម វីរីយ៉ា
សៀមរាប ថ្ងៃទី១០ ខែកក្កដា ឆ្នាំ២០១៣