សម្រស់វាលស្រែ ខែស្រាពណ៍ឆ្នាំម្សាញ់
ទឹកភ្លៀងដក់ពេញ រលេញគុម្តស្រូវ
ធម្មជាតិបៃតង ផ្សងចិត្តប៉ងនៅ
ស្រូបខ្យល់រដូវ ត្រជាក់ដួងចិត្ត។

សម្រស់ស្រុកខ្មែរ ក្បែរដងបុព្វតា
វែងផុតនេត្រា ចាររឿងអឌិត
កាលបងនិងអូន សាងក្បូនស្នេហ៍ពិត
ប្រលោមកាយស្និទ្ធ ក្រោមទឹកសន្សើម។

វាលស្រែវាលស្រូវ ខ្ទមស្បូវរនាប
បងលូកដៃស្ទាប អង្អែលថ្ពាល់ឆ្នើម
វាយោត្រជាក់ ធ្លាក់ឈ្លក់ដង្ហើម
អស្ចារ្យសម្បើម ផ្ដើមស្នេហ៍ថែចង។

សម្លឹងមើលមេឃ ផ្លេកបន្ទោព្រាក
ភ្ញាក់ខ្លួនស្ទុះងាក ក្រសោបអោបបង
នឹកឡើងសែនខ្មាស់ កំពិសក្តាមខ្យង
ហិចហែលត្រសង ចងចិត្តម្ចាស់ថ្លៃ។

សម្រស់ស្រុកខ្មែរ វាលស្រែជើងភ្នំ
ផ្គរលាន់រងំ ប្រគំយប់ថ្ងៃ
ភិរុណបង្អុរ ជោគដួងហឫទ័យ
ថ្ងៃស្អែកថ្ងៃថ្មី យើងជួបគ្នាទេ?

——————————
ដោយ លឹម វីរីយ៉ា
សៀមរាប, ថ្ងៃទី ៣១ កក្កដា ឆ្នាំ២០១៣