ក្រវេក្រវ៉ូ ដូរខ្សែក្រវាត់
លោកខែបាំងឆត្រ បាត់ដួងចន្ទ្រា
ស្រុកយើងវិលវល់ ពុលងាប់មាន់ទា
អ្នកឆ្កួតអ្នកជា ឆ្លងគ្នាពាសវាល។

ស្រណោះគ្រាដើម ខ្សត់ណាស់ឧកញ៉ា
គ្មានទេដុល្លារ ស្គាល់តែលុយរៀល
ស្រុកខ្មែរពីមុន ខ្សត់ទាំងជនពាល
ពាក្យជេរតិះដៀល ក៏មិនសូវឮ។

សម័យឥឡូវ អាស្រូវកប់មេឃ
តារាភ្លឹបភ្លែត ច្បេតរះឡើងភ្លឺ
ដល់ដាក់កែវយឹត ពិនិត្យជំងឺ
ឃើញហើយឡើងព្រឺ សុទ្ធតែផ្កាយចោរ។

ស្រីស្អាតឆើតឆាយ ចាយលុយទាំងបាច់
លក់ឡេលាបសាច់ ស ដូចមាន់ស្ងោរ
តាមពិតលួចលាក់ លបពាក់កន្ថោរ
ស៊ីឈ្នួលឱ្យចោរ លាងលុយពណ៌ខ្មៅ។

នាងអើយនាងស្រី ល្បីខាងមាសពេជ្រ
ថ្ងៃរះគង់លិច ឈាមស្រែកស្បែកហៅ
ដើរតួសម្ដែង ក្លែងមេអំបៅ
តាមពិតជាខ្លៅ កូនចៅបិសាច។

នាងអើយនាងល្អ សាច់ ស ដូចខ្មោច
ប្រយ័ត្នឆេះខ្លោច ព្រោះភ្លើងកំណាច
ក្លែងជាសេដ្ឋី ចង់ឱ្យគេខ្លាច
តាមពិតអំណាច ប្រៀបដូចជាខ្យល់។

សូមភ្ញាក់ខ្លួនឡើង តម្កើងធម៌ព្រះ
ទើបនាងអាចឈ្នះ រះភ្លឺឥតកល
ឈប់រស់សាងបាប ឆ្អាបពេញសាកល
ថ្វាយខ្លួនឱ្យដល់ ពាល់សច្ចធម៌។
———-

វិរិយា 🌸

ថ្ងៃព្រហស្បតិ៍ ១៣រោច ខែស្រាពណ៍ ឆ្នាំមមី អដ្ឋស័ក ព.ស. ២៥៧០ ត្រូវនឹង ថ្ងៃទី១០ កញ្ញា គ.ស. ២០២៦