ថ្ងៃនេះឆ្នាំមុន ដួងចិត្តទារុណ ព្រួយនឹងអ្នកម្ដាយ
ឈឺធ្ងន់ហួសថ្លែង មិនដែលរសាយ
កូនៗខ្វល់ខ្វាយ ខ្លាចម្ដាយទៅចោល។
ថ្ងៃនេះឆ្នាំមុន ម៉ាក់អ៊ើយកូនយំ ខ្លាចបាត់ស្រមោល
គ្រូពេទ្យលួចខ្សឹប ខ្ញុំសួរដេញដោល
ខ្លាចរស់តែលតោល ក្នុងក្រោលឥតម៉ែ។
ថ្ងៃនេះឆ្នាំមុន កូនបន់អ៊ើយបន់ បន់ស្រន់ឥតល្ហែ
សូមឱ្យម្ដាយជា សាងផ្នួសមួយខែ
យមរាជមិនប្រែ ឆក់ម៉ែទាល់តែបាន។
————
២៧ សីហា ២០១៥
បើសិនលោកនេះមានបារមី
ពូកែខ្លាំងក្រៃដូចនិទាន
អាចចម្លងមនុស្សផុតស្រេកឃ្លាន
រស់ក្នុងនិព្វានឋានផុតទុក្ខ។
បើសិនជីវិតពិតមានកម្ម
កូនសុខចិត្តទ្រាំជំនួសមុខ
បួងសួងឧទ្ទិសម្ដាយបានសុខ
ផុតចាកក្ដីទុក្ខរួចគុកកម្ម។
សូមអធិដ្ឋានអស់បារមី
កំពូលខ្លាំងល្បី ចូរចងចាំ
បើម្ដាយខ្ញុំជា ផុតជ្រោះកម្ម
មិនបាច់រង់ចាំ ខ្ញុំសាងផ្នួស។
ដោយ លឹម វីរីយ៉ា
ថ្ងៃទី១៥ ខែកញ្ញា ឆ្នាំ២០១៤
Viriya Lim's Blog 