Category Archives: ស្រុកខ្មែរដែលខ្ញុំទៅដល់

ទឹកជ្រៅតែងស្ងប់…

ខ្លែងហោះបានខ្ពស់​ ព្រោះកម្លាំងខ្យល់
មារយាទ​លាក់កល​ ព្រោះខ្វល់កិលេស
ដូងផ្អែមថែមរស​ ព្រោះគល់កប់ផេះ
ម្នឹះល្ងង់ធេីចេះ​ អាចឆេះផែនដី។

ទឹក​ជ្រៅតែងស្ងប់​ កប់ចិត្តអ្នកប្រាជ្ញ
អ្នកឆោតមាត់ដាច​ ប្រសាចសម្ដី
បេីទឹកត្រជាក់​ ជាក់ជាផ្ដុំត្រី
ពេចន៍​ផ្អែមមានន័យ​ ស្រីប្រុស​ប្រឡាញ់។

ពួកបក្សបីសាច​ ខ្លាចខ្មោចក្នុងផ្នូរ
គោះប៉ោតទូងស្គរ​ ជន្លបោះបាញ់
ទាត់​ចោលពាក្យព្រះ​ ឈ្នះទៅទាំងចាញ់
សាងគ្រាប់ទុកបាញ់​ ប្រមាញ់គ្នាឯង។
————-
លឹម​ វីរីយ៉ា​🌸
០៥​ តុលា​ ២០១៩

ថតនៅស្រះចិញ្ចឹមត្រី ក្នុងចម្ការរបស់សាច់ញាតិបងសុមន្ថា បន្តចេញពីទីនេះទៅ គឺចម្ការអំពៅ ចម្ការដូង ចម្ការដំណាំហូបផ្លែជាច្រើន ក្នុងខេត្តព្រះត្រពាំង កម្ពុជាក្រោម

សង្ឃឹមថ្ងៃមួយ…

ថ្ងៃ​លិចពព្លាក់​ ធ្លាក់​ក្រោយជេីងភ្នំ
ប្រចៀវប្រជុំ​ ងំហេីរពេញមេឃ
ពពកពពូន​ លូនចង់ក្រាបដេក
ចាំផ្កាយយូរពេក​ រែកពន់ទឹកភ្លៀង។

សម្រេចចិត្ត​ខុស​ ស្លុះស្លុងផុងផុយ
ផ្លូវយេីងដីហុយ​ ប្រថុយឡេីងផ្អៀង
ស្រុកគេជ្រេកង់​ ចង់ជិះហេីយច្រៀង
ថ្នល់ស្អាតឥតល្អៀង​ លាងល្អដោយចិត្ត។

សង្ឃឹម​ថ្ងៃ​មួយ​ ត្រួយផ្ការំដួល
គេដាំឡេីងទួល​ ឆួលលម្អងស្អិត
ថ្ងៃនោះមានមែន​ វេនអ្នកបណ្ឌិត
នឹងបានគ្រោងគិត​ ខិតពេចន៍ប៉ប៉ោច។

ស្រណោះស្រុកស្រែ​ នាខែអស្សុជ
បេីមានដៃហុច​ ប៉ុនសុចស្រមោច
ប្រហែលអាចច្នៃ​ ស្រមៃដល់ខ្លោច
ក្មេងក្មាងខ្លាចខ្មោច​ ហោចហិនអ្នកតា។

ខ្ញុំ​សូមបួងសួង​ លួងសូមព្រះឥន្ទ្រ
ដីខ្មែរថែចិន​ កាច់កិនលោកា
បូព៌ា​និរតី​ ស្ដីឈប់ប្រហារ
បារមីអស្ចារ្យ​ រក្សាម្ចាស់ស្រុក។
————-
លឹម​ វីរីយ៉ា​🌸
០៤​ តុលា​ ២០១៩

នៅច្រកទ្វារអន្តរជាតិច្រកភ្នំដិន ព្រំប្រទល់វៀតណាម កម្ពុជា ត្រង់ចំណុចខេត្តតាកែវ ក្នុងដំណើរត្រលប់មកពីកម្ពុជាក្រោមវិញ តាមរថយន្តក្រុងពេលយប់។ រូបនេះ តាមពិត គឺពេលព្រឹកម៉ោង ៧ ថ្ងៃរះទេ…

ព្រលឹមអុរនៅព្រះត្រពាំង

ព្រលឹមថ្ងៃរះ​ ជះដួងឆព្វណ្ណ
អរុណរួសរាន់​ ជាន់ពពកថ្លា
ភ្លៀងចង់ខ្ជាក់ហូរ​ ជំនោរតុលា
អ្នកស្រែយាត្រា​ ងេីបបំពេញកិច្ច។

អរុណសួស្ដី​ ពីព្រះត្រពាំង
ខេត្ត​ខ្មែរ​ជាប់គាំង​ ទាំងគេបំភ្លេច
សូមស្គាល់​តែសុខ​ មុខខ្ពស់ជានិច្ច
អ្នកកេីតអ្នកលិច​ កុំភ្លេច​គ្នាយេីង​។
————-
លឹម​ វីរីយ៉ា​🌸
០២​ តុលា​ ២០១៩

នេះជាកូនប្រុសពៅរបស់ម៉ាក់យ៉ា នៅក្នុងចម្ការពោត ក្បែរមាត់ព្រែក ក្នុងខេត្តព្រះត្រពាំង កម្ពុជាក្រោម

ដងព្រែក…

ព្រឹកព្រាង​ថ្ងៃរះ​ ជះប៉ះចុងដួន
ចុះស្រែថែសួន​ ពួនតាមដងព្រែក
ជីវិត​ស្រុកស្រែ​ ខ្មែរនៅក្រោមមេឃ
តោះ! ងេីបពីដេក​ ទៅរែកអាចម៍គោ។

ខេត្ត​ព្រះ​ត្រពាំង​ ឃាំងដោយទឹកប្រៃ
ដងព្រែកពេញព្រៃ​ ដីដុះហួសអូរ
ខ្មែរ​លេីខ្មែរក្រោម​ ឡោមរកពុទ្ធោ
អ្នកណាស៊ីជោរ​ មកកូរគ្នាលេង។

លឹម​ វីរីយ៉ា​🌸
២៩​ កញ្ញា​ ២០១៩

នៅមាត់ព្រែក ក្នុងចម្ការពោតរបស់ឳពុកម្ដាយ បង សុមន្ថា ក្នុងភូមិបាយឆៅ ស្រុកថ្កូវ ខេត្តព្រះត្រពាំង កម្ពុជាក្រោម

ទៅបុណ្យភ្ជុំឆ្លងស្រុក…

ភ្លៀងធ្លាក់មិនដាច់គ្រាប់​ គាប់ចិត្តអ្នកស្រែ
ឮសូរតែរ៉ែៗ​ ក្បែរភពមនុស្សា
វេនបិណ្ឌក្នុងថ្ងៃនេះ​ វិសេសមហា
រីករាយក្នុងចិន្ដា​ ជ្រះថ្លា​កន្លង។

យេីងទៅបុណ្យភ្ជុំធំ​ ម្ដុំខ្មែរខាងត្បូង
កុំឱ្យខ្មោចវាលង អន្ទងផ្ដោះផ្ដង
ខេត្ត​ឃ្លាំងពាំងថ្មភ្នំ​ មុំផ្លោះរបង
ជាតិ​ខ្មែរថែគ្នាផង​ ខ្ញុំឆ្លងទៅហេីយ។
————
លឹម​ វីរីយ៉ា​🌸
២៥​ កញ្ញា​ ២០១៩

កម្សត់ខ្លួននៅមណ្ឌលគីរី…

រ៉េករ៉ាក​ រេរា​ គ្នាឡើងល្អៀច
មុខឡើងកំពៀច​ វៀចឡើងប៉េវ
យប់យន់រាត្រី​ សម្ដីខ្សេវ
លាន់ឮ​ ងេវៗ​ គ្រេវ​ម៉ាគ្រា។

មណ្ឌលគិរី​ ស៊ីអារម្មណ៍​
រីករាយ​លែងសម​ ស្នំវេលា
ស្លៀកខោធ្លាក់គូទ​ រូតក៏ហៀ
ធើដូចវេទនា​ គ្នាឡើងក្រាប។

ក្រុងអ៊ើយក្រុងភ្នំ​ ងំតែឯង
គ្នាសែនចម្បែង​ ថ្លែង​តាមកាព្យ
សែនមនោរម្យ​ ប្រជុំដាប
ឥសាន្ត​មិនខាប​ ឆាបខ្ញុំសោះ។

រាត្រី​សួស្ដី​ ឥលូវដេក
ខ្ញុំសូមបិទ​ភ្នែក​ទាំងអាឡោះ
សុបិន​លើភ្នំ​ រុំឆ្ងាយកោះ
អាល័យ​ស្ទះអស់…​ តោះ! ចូលគេង
—————
លឹម​ វីរីយ៉ា​🌸

រាត្រី​សុវត្ថិ​ពីក្រុងសែនមនោរម្យ​ មណ្ឌលគិរី​

០៩​ ធ្នូ​ ២០១៨

VIRIYA LIM Misserable Status

មណ្ឌលគីរី…

ដីទួលដីខ្ពស់​ ឦសានល្បីឈ្មោះ​
ព្រោះ​ធាតុ​ត្រជាក់​ ជំនោរ​ចុងឆ្នាំ​
ផ្ដែផ្ដាំ​ជាក់លាក់​​ ម្ចាស់​ភូមិ​រាក់ទាក់​
ស្ទាក់បេះដូងខ្ញុំ។

លឹម​ វីរីយ៉ា​🌸

មណ្ឌលគីរី វីរីយ៉ា

សាយណ្ហសួស្ដីពីដីសណ្ដ…

សាយណ្ហ​សួស្ដី​ ពីដីសណ្ដ
សូរសែងទិនករ​ កំដរពីលិច
ខ្យល់មាត់ទន្លេ​ បំពេ​តិចៗ
រស្មី​ព្រិចៗ​ រំលេចព្រលឹង។

សាយណ្ហ​ទន់ទាប​ ដីរាបទន់ទេរ​
រសៀលទន់ជ្រេ​ មាសមេទន្ទឹង
ទន្ទេញ​ពាក្យ​ចាំ​ ផ្ដាំដល់ម្ចាស់ស្ទឹង
សន្យា​បាត់​ឈឹង​ ប្ដឹង​ទៅ​នរណា?

សាយណ្ហ​ហួសទៅ​ នៅសល់ដួងចន្ទ្រ
ដេកមិនប្រកាន់​ ធ្វើខ្មាន់វេហា
តារារយដួង​ លួងសូមស្នេហា
ព្រះឥន្ទ្រ​ ឥតត្រា​ ប្រាថ្នាយកត្រើយ។

សាយណ្ហ​កល់ខ្នើយ នៅឡើយរាត្រី
ចរចាចិចី​ ស្ដី​សូមឱ្យឆ្លើយ
ដីកោះនៅម្ខាង​ កាងដល់ណាហើយ?
មេឃកុំកន្តើយ​ សូមឆ្លើយប្រាប់ផង!
———-
លឹម​ វីរីយ៉ា​🌸
១៤​ ធ្នូ​ ២០១៨

Viriya in the late evening

កំពង់ដរ…

មើលឃើញទឹកស្អុយ​ ស្លុយ​អារម្មណ៍​
ដីស្អិត​ដិតជ្រាំ​ ខំ​ត្រដរ​
ទឹកហូរអ្នកមាន​ ប្រៀនអ្នកក្រ
អមកំពង់ដរ​ រង់ចាំស្ពាន។

មើលឃើញដីខ្មៅ​ ដៅក្រោមទឹក
ក្រាលក្អែលល្ងាចព្រឹក​ នឹកអ្នកស្មៀន​
ប្រដៅកោកៗ​ ក្រោកមករៀន
ទន្ទេញ​របៀន ឈានរុងរឿង។

មើលឃើញទឹកហូរ​ ថ្ងូរ​ប្រាប់មេឃ
ទ្រហោយូរពេក​ ស្លេកឡើងកឿង
សាឡាង​ខំកល់​ ដល់ឆ្លងមឿង
បើអ្នកចិត្តសឿង​ សង់ស្ពានផង!
———
លឹម​ វីរីយ៉ា​🌸
ភ្នំពេញ​ ១១​ វិច្ឆិកា​ ២០១៨

46102166_10215910565213446_7644941851580956672_n

អនុស្សាវរីយ៍នៅរតនគីរី…

ទឹកជ្រោះគោះថ្មរណ្ដំ
កាទៀងភិរម្យ ចាអ៊ុងដួងចិត្ត
កាចាញ ត្រជាក់អម្រឹត
គង្គារហៀស្និទ្ធ ផ្ដិតហូរសង្ឃឹម។💦

ទឹកធ្លាក់ខ្ជាក់សូរឥតផ្ទឹម
ឦសានព្រលឹម ប៉ប្រឹមភូមិគ្រឹង
បានលុង គង់វង្សដល់ម្លឹង
ចារ៉ាយស្លៀកប៉ឹង ឯបឹងយក្ខឡោម។🌳

កូនម៉ុម អូរជុំ ឆើតឆោម
កម្សាន្តប្រឡោម ឯអណ្ដូងមាស🚏
ជ្រោះអូរយ៉ាដាវ ហូរវាស🎋
បរកែវចែវចៀស ក្បៀសដល់តាតតៃ។🎑

ទេសភាពល្អស្រស់ពេកក្រៃ🌻
លំផាត់ម្ចាស់ថ្លៃ ដែនដីខ្មែរលើ🌺
វ៉ើនសៃក្រមុំជំទើរ 👰
ពួនក្នុងខ្ទមឈើសង់ខ្ពស់ផុតដី។🏡

ឯឡាបានសៀកអាល័យ🌄
សាយណ្ហល្ងាចថ្ងៃ វិលវៃបឺតស្រា🍶
ក្បែរបឹងកន្សែងស្នេហា🌿
ស្អែកទៅពេជ្រាដា ទស្សនាជ្រោះធំ។🌲

នៅអូរស៊ីនលែរត្រសុំ🍁
ត្រសាយខ្ចាយជុំម៉ុមរឭកហួស
ទន្លេស្រែពកជ្រកឈ្មោះ🌅
ខណ្ឌចែកបែកយស យកឈ្មោះកោះញែក។🗻

អនុស្សាវរីយ៍ល្អឯក😋
ថតរូបស្រស់ប្លែក អល់អែកអៀនអន់😜
ទុករូបឡើងឆ្លងជំនាន់🍃
ឭសៀងផ្គរលាន់ បន់ទៅម្ដងទៀត។🍂

រតនគីរីមានជាតិ🌱
ដីស្អិតមិនគ្រាត ឃ្លាតយូររឭក🌿
ទេសចរអំណរឡើងភ្លឹក😘
ឆ្ងាញ់ទាំងបាយទឹក នឹកណាស់ម្ចាស់ស្រុក!!!😇
———
លឹម វីរីយ៉ា🌸

ថ្ងៃព្រហស្បតិ៍ ៧កើត ខែជេស្ឋ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទិ ០១ ខែមិថុនា គ.ស ២០១៧

IMG_4359_002