ខ្ញុំសូមអនុញ្ញាតពេលវេលាមួយសន្ទុះ ដើម្បីបង្ហាញជូនប្រិយមិត្តនូវសៀវភៅ ដ៏អស្ចារ្យមួយប្រភេទ ដែលទើបតែមានជាលើកដំបូងនៅកម្ពុជា។ លោកអ្នកធ្លាប់ជួបទេ? អានសៀវភៅ! ប៉ុន្តែទទួលអារម្មណ៍ដូចជាទស្សនាខ្សែភាពយន្ត។ នេះជាសៀវភៅប្រលោមលោករូបភាព ដែលសាច់រឿងខាងក្នុងយកលំនាំតាមជីវិតរបស់ រស់ សេរីសុទ្ធា តារាចម្រៀងខ្មែរដ៏ល្បីល្បាញដែលមានកំណើតពីខេត្ដបាត់ដំបង។ គ្មានជនជាតិខ្មែរណាដែលថាមិនធ្លាប់ដឹងពីសំឡេងរបស់គាត់ទេ ទោះជាស្ថិតនៅក្នុងវ័យណាក៏ដោយ។

 “រស់​ សេរីសុទ្ធា” ត្រូវបានប្រសិទ្ធងារ ថាជា “រាជនីសំឡេងមាស” ដែលងារនេះត្រូវបានដាក់ជូនដោយ “ព្រះករុណាសម្ដេចនរោត្ដមសីហនុ” ក្នុងអំឡុងពេលដែលកេរ្តិ៍ឈ្មោះរបស់គាត់កំពុងឡើងដល់កម្រិតកំពូលក្នុងចុងទសវត្សរ៍ ១៩៦០ និង ដើមទសវត្សរ៍ ១៩៧០។

តើសៀវភៅប្រលោមលោករូបភាព រាជនីសំឡេងមាស ដែលមានភាសាអង់គ្លេសដាក់ថា The Golden Voice មានលក្ខណៈពិសេសអ្វីខ្លះ?

ភាពពិសេសមួយរបស់សៀវភៅរាជនីសំឡេងមាស ដែលខ្ញុំអត់ទ្រាំមិនសរសើរមិនបាននោះ គឺ សៀវភៅនេះ មិនមានអក្សរច្រើនដើម្បីអាននោះទេ។ ផ្ទុយទៅវិញ គ្រប់ទំព័រ មានសុទ្ធតែឈុតរូបភាពគំនូរផាត់ពណ៌ ដែលជាហេតុធ្វើឱ្យអ្នកអានសប្បាយរីករាយក្នុងអំណាន។

 រូបភាពច្រើនជាងអក្សរបែបនេះ គឺជាសិល្បៈមួយប្រភេទដែលអាចអន្ទងចិត្តកុមារ ដែលទើបតែរៀនចេះអានអក្សរ ឱ្យជក់ចិត្តដូចគ្នាដែរ។ មានន័យថា សៀវភៅនេះអាចអានបានងាយស្រួល តាំងពីមនុស្សចាស់ៗរហូតដល់កុមារតូចៗ។ ហើយបើកុមារតូចមើលរូបភាពនិងអានអក្សរហើយនៅមិនយល់ មនុស្សចាស់ក៏ងាយនឹងពន្យល់ឱ្យក្មេងឆាប់យល់បានរហ័ស។

ក្រៅពីនោះ សៀវភៅប្រលោមលោកឆាករូបភាព រាជនីសំឡេងមាស មានលេខកូដសម្រាប់អ្នកអាន អាចផ្ទៀងផ្ទាត់ចុចចូលស្ដាប់បទចម្រៀងសម័យដើមបានយ៉ាងងាយស្រួល តាមរយៈ QR Code និងសេចក្ដីណែនាំពីរបៀបស្កេនចូលស្ដាប់បទភ្លេងនៅទំព័រខាងដើម។ ដូច្នេះ ឃើញថា យើងអាចអានរឿងបណ្ដើរ ស្ដាប់សំឡេងចម្រៀងអមឈុតឆាកនៃសាច់រឿងនោះបណ្ដើរបាន។ ឈុតណាតួអង្គសប្បាយៗ យើងក៏ឮសូរបទចម្រៀងបែបសប្បាយៗញ័រញាក់កន្ត្រាក់អារម្មណ៍ ឈុតឆាកណាតួអង្គមានបញ្ហាកម្សត់ៗកើតឡើងក្នុងជីវិតគាត់ យើងក៏ឮសូរបទចម្រៀងបែបតម្អូញទួញសោក ធ្វើឱ្យយើងកម្សត់ចូលតួស្លុងទៅតាមសាច់រឿងដែរ។ បច្ចេកវិទ្យានេះ ធ្វើឱ្យអ្នកអានជក់ចិត្តដិតអារម្មណ៍ខ្លាំងជាងការអានសៀវភៅធម្មតាៗ។

ខ្ញុំសូមផ្ដល់ជាមតិយោបល់ថា បងប្អូនជនជាតិខ្មែរយើង គួរតែមានសៀវភៅនេះ យ៉ាងហោចមួយក្បាល ជាឯកសារផង ជាឧបករណ៍សិល្បៈកំដរអារម្មណ៍ផង និងជាការចូលរួមលើកស្ទួយ មរតកចម្រៀងចាស់ៗដ៏មានតម្លៃរបស់ខ្មែរយើងផង ឱ្យស្ថិតនៅគង់វង្សជារៀងរហូត។ តាមរយៈសៀវភៅនេះ យើងអាចជួយឱ្យក្មេងជំនាន់ក្រោយ បានស្គាល់អតីតតារាចម្រៀងដ៏ល្បីរបស់កម្ពុជា ដែលពួកគេកន្លងមកបានឮតែសំឡេងច្រៀងក្នុងខ្សែអាត់ផ្សេងៗតែម្យ៉ាង។

ទម្រាំតែបានចេញជារូបរាងសៀវភៅនេះឡើងមកបាន មានរឿងរ៉ាវពីក្រោយឆាកច្រើនរាប់មិនអស់ ដែលក្នុងនោះ រនាំងឧបសគ្គខ្លះដោះចេញ ខ្លះនៅតែដោះមិនចេញ។ ទម្រាំមានសៀវភៅរាជនីសំឡេងមាសជាភាសាខ្មែរនេះឡើងមកបាន វាមិនមែនជាភាពងាយស្រួលឡើយ។ មានមនុស្សច្រើនណាស់ ទាំងខ្មែរ និងបរទេស ដែលបានចូលរួមចំណែកយ៉ាងសស្រាក់សស្រាំ ក្នុងការផ្ដល់ព័ត៌មានពាក់ព័ន្ធ ជាភ័ស្ដុតាង ជាសាក្សី។

សៀវភៅនេះ លក់នៅក្នុងទីផ្សារប្រទេសកម្ពុជា តាមរយៈភ្នាក់ងារចែកចាយផ្សេងៗ ដូចជាបណ្ណាគារ និងទីផ្សារអនឡាញមួយចំនួន និងលក់ក្នុងតម្លៃធូរខ្លាំងមែនទែន ដើម្បីជួយសម្រួលដល់ជនជាតិខ្មែរដែលគោរពស្រលាញ់ រស់ សេរីសុទ្ធា មានលទ្ធភាពទិញអានបាន។

កាលពីទិញសៀវភៅនេះដំបូង ខ្ញុំគ្រាន់តែគិតថា ទិញសិនទៅជាជាងបានជួបអ្នកលក់ហើយ កុំឱ្យវាខាតជើង ក្រែងថ្ងៃក្រោយចង់បាន នាំពិបាករកទិញ។ ប៉ុន្តែ នឹកស្មានមិនដល់សោះថា ក្រោយពីបានអានចប់ ខ្ញុំបានកុម្ម៉ង់ទិញថែមចំនួន២ក្បាលទៀត សម្រាប់ជាអំណោយដល់ក្មួយៗរបស់ខ្ញុំបានអានដែរ។ ហើយខ្ញុំហាក់ដូចជាមោទនភាពប្លែកចំពោះស្នាដៃក្រុមការងារ The Golden Voice ទាំងអស់។

ជាចុងក្រោយ សូមអ្នកនិពន្ធ អ្នកដឹកនាំរឿង អ្នកបកប្រែ និងអ្នកតំណាងសៀវភៅគ្រប់ៗគ្នាដែលកន្លងមក បានចូលរួមផ្សព្វផ្សាយ ទទួលយកនូវការគោរព ស្រលាញ់ ពីខ្ញុំ ដោយភាតរភាព!