ជំនាន់ទី១០ បញ្ចប់ផុតទៅ

បន្សល់ទុកនៅ សៀវភៅចំណេះ

និស្សិតស្រីប្រុស ស្រុះដៃចាក់ស្រែះ

ថ្ងៃល្អវិសេស ស្លេះត្រឹមពេលហ្នឹង។

គ្រប់គ្នាឆ្លៀវឆ្លាត សង្វាតសិក្សា

គ្រូបាអាចារ្យ ប្រាថ្នាសិស្សប្រឹង

ឫសគល់ជោគជយ័ ល្វីងណាស់ត្រូវដឹង

ជូរចត់ដល់ម្លឹង ព្រោះប្រឹងយកផ្លែ។

សូមជូនពរប្អូន រលូនដោយលាភ

កិត្តិយសគ្មានប្រៀប រាប់រៀបឥតល្ហែ

ថ្ងៃនេះទៅមុខ រឿងស្មុគ្រឈប់ក្បែរ

ភ្លឺដូចដួងខែ ចោមស្នេហ៍ដោយផ្កាយ។

អនុស្សាវរីយ៍ ជាទីស្នេហា

អ្នកគ្រូរីយ៉ា បោះត្រាពីឆ្ងាយ

ជូនជាបន្ទាន់ ទុកគ្រាន់សប្បាយ

ញញឹមស្រស់ស្រាយ ចាយមួយជីវិត។

ថ្ងៃក្រោយមានយស រស់នៅដោយសក្ដិ

មានងារខ្ពស់ថ្នាក់ ឆ្លាក់ឈ្មោះបណ្ឌិត

តែចូរកុំភ្លេច កុំគេចការពិត

ល្វីងពីអឌិត ផ្អែមឆ្អិតមួយជាតិ។

——————-

ពីអ្នកគ្រូ លឹម វីរីយ៉ា

សៀមរាប, ថ្ងៃព្រហស្បត្តិ៍ ២រោច ខែបឋមាសាឍ ឆ្នាំមមែ សប្ដសក័ ព.ស ២៥៥៩

ត្រូវនឹងថ្ងៃទី២ ខែកក្កដា គ.ស ២០១៥