រដូវត្រជាក់ ត្រជុំក្បែរអ្នក❄
ត្រជាក់ក្បែរម៉ុម ខែបុស្សស្រុកយើង💧
ខ្យល់ផាត់រណ្ដំ ដណ្ដប់ជើងភ្នំ🌄
រងំជើងមេឃ។ 🌌

រដូវរំហើយ រំយោលស្លឹកតើយ🍃
រហើយទងមែក រំដួលដូរដី🌺
ដំរីឆ្លងព្រែក តែស្ពានផុយពេក💥
ដេកដួលធ្លាក់ទឹក។ 🐘🐾

រដូវរងា រងំជុំគ្នា🎄
រងាឡើងភ្លឹក ដំណក់សន្សើម💦
ដណ្ដើមពេលព្រឹក កកផ្ដុំរដឹក🌠
នឹកដៃកាន់ដើរ។ 👫

រដូវហេមន្ត ហិម:ធ្លាក់ទន់🍂
ភាយគន្ធប្រហើរ ប្រហែលប្រហែស🌾
ធ្វេសពេចន៍សរសើរ រសើបហើបដើរ👣
ស្នើសូមលោមសុខ។ 💕

រដូវឆ្កែលូ ខ្យល់បក់វូៗ🐕
ធូរចិត្តអ្នកស្រុក យប់ជ្រៅឥតផ្គរ🎶
សូរក្ដក់តិកតុក សៀងស័ព្ទឆ្កែស្រុក🎼
សុខសាន្តពេញភូមិ។ 😇
——–
(បទកាកគតិ ចង្វាក់ធម្មតា)

ដោយ លឹម វីរីយ៉ា🌸

ថ្ងៃអាទិត្យ ៤កើត ខែបុស្ស ឆ្នាំវក អដ្ឋស័ក ព.ស ២៥៦០ ត្រូវនឹងថ្ងៃទី ១ ខែមករា គ.ស ២០១៧