កន្លងមក ពួកយើងនិយមនាំគ្នាលើកតែប្រធានបទ “ផ្សែងបារី” យកមកវិភាគ វែកញែក ដើម្បីអប់រំមនុស្សឱ្យយល់ដឹង និងចេះគេចខ្លួនឆ្ងាយពីផ្សែងបារី ដែលជាសារធាតុបំផ្លាញផ្លូវដង្ហើម និងសួតរបស់មនុស្ស ទាំងអ្នកជក់ផ្ទាល់ និងអ្នកហិតផ្សែងដែលនៅក្បែរខាង។

វាជាការកម្រណាស់ ដែលមានអ្នកវិភាគពិចារណាដល់គ្រោះថ្នាក់របស់ផ្សែងធូប។ ធូប គឺជាគ្រឿងបូជាក្នុងជំនឿមើលមិនឃើញនៃលទ្ធិព្រហ្មញ ហិណ្ឌូ និងសាសនាចិន។ ធូប ត្រូវបានគេយកមកប្រើសម្រាប់ដុតបង្ហុយ ក្នុងពិធីកម្មផ្សេងៗ ដូចជា ការសែនព្រេនខ្មោច ព្រាយ បិសាច អារុក្ខអារក្សអ្នកតា អមនុស្សនានា ក៏ដូចជា ការដុតបង្ហុយយកក្លិនក្រអូបដែលគេបានផ្សំពីខ្លឹមឈើចម្រុះច្រើនប្រភេទ ក្នុងផ្ទះសម្បែង ឬ ដេញមូស ដេញសត្វល្អិតផ្សេងៗដែលបង្កក្ដីរំខានដល់ជីវភាពរស់នៅប្រចាំថ្ងៃ ជាដើម។

បើនិយាយពីធាតុផ្សំរបស់ធូប ពីដើមឡើយ ប្រហែលជាគេផលិតមកពីធម្មជាតិពិតមែន ប៉ុន្តែតម្រូវការកើនឡើងពីមួយជំនាន់ទៅមួយជំនាន់ ស្របពេលដែល អ្នកជំនួញស្ទើរគ្រប់ជាតិសាសន៍ ក៏ផ្ដើមបាត់បង់មនសិកាទៅដែរនោះ ធូប ក្នុងប្រទេសជាច្រើន មិនត្រូវបានផលិតដោយធម្មជាតិដូចមុនទៀតទេ ព្រោះតែហេតុផលប្រាក់ចំណេញ។ ទោះជាធូប ផលិតពីអ្វីក៏ដោយ ការដុតបង្ហុយផ្សែងជាប្រចាំថ្ងៃ ហើយមនុស្សចេះតែបឺតស្រូបចូលទៅក្នុងខ្លួនញឹកញាប់ វានឹងបណ្ដាលឱ្យកើតជំងឺសួត ដូចគ្នាទៅនឹងអ្នកបឺតស្រូបផ្សែងបារីដែរ។

អ្នកស្រាវជ្រាវផ្នែកសុខាភិបាលពិភពលោក បានសិក្សាទៅលើប្រជាជនឥណ្ឌា ដែលកាន់សាសនាហិណ្ឌូ ហើយប្រកាន់ទម្លាប់ដុតទៀនធូបបូជាអាទិទេព បួងសួងសូមក្ដីសុខរៀងរាល់ថ្ងៃសីល និង ប្រជាជនចិនដែលជឿលើលទ្ធិព្រលឹង ហើយប្រកាន់ទម្លាប់ដុតទៀនធូប សែនអាហារខ្មោចជាប្រចាំ ក្នុងរយៈពេលតែប៉ុន្មានឆ្នាំប៉ុណ្ណោះ បានប្រឈមនឹងជំងឺច្រើនមុខ។ ក្នុងនោះ ជំងឺសួត និង ជំងឺភ្នែក ជាជំងឺនាំមុខគេ ក្នុងទិន្នន័យស្រាវជ្រាវ។ ចំណែកជំងឺផ្សេងទៀត ជាផលរំខានដោយប្រយោល ដែលបង្កពីការខូចខាតសួត និង ភ្នែក។ វេជ្ជបណ្ឌិត បានណែនាំ ឱ្យអ្នកជំងឺទាំងអស់នោះ ឈប់ដុតធូប១០០% ហើយងាកមកបួងសួងដោយដៃទទេ ដូចប្រជាជនមូស្លីមវិញ ក៏ឃើញថា សុខភាពរបស់ពួកគេ បានល្អប្រសើរគួរកត់សម្គាល់។

បច្ចុប្បន្ន ក្រុមវេជ្ជបណ្ឌិត និងសមាគមសុខភាពនានានៅទូទាំងពិភពលោក បានខិតខំព្យាយាមអប់រំមនុស្សឱ្យផ្លាស់ប្ដូរទំនៀមទម្លាប់ទាំងឡាយណា ដែលបង្កបញ្ហាអាក្រក់ៗដល់ខ្លួនឯងនិងអ្នកជិតខាង តាមរយៈការលើកទឹកចិត្តមនុស្សឱ្យងាកមកបដិបត្តិសមាធិ រក្សាតុល្យភាពឈាម និង ខ្យល់ ក្នុងរាងកាយវិញ។ ហើយវិធីធ្វើសមាធិនេះ ក៏ស្របគ្នាទៅនឹងមាត្រាអប់រំនានាក្នុងគម្ពីរសាសនា ទាំងអស់ក្នុងពិភពលោកដែរ។

មិនថាលោកអ្នកកាន់សាសនាអ្វីទេ ត្រូវតែប្រកាន់ខ្ជាប់ជានិច្ចថា គ្រប់សកម្មភាពដែលធ្វើឡើងនៅខាងក្រៅខ្លួនប្រាណ មិនមែនជាវិធីបង្កើតសេចក្ដីសុខឡើយ។ សេចក្ដីសុខពិតប្រាកដ គឺសកម្មភាពនៅខាងក្នុងរាងកាយទៅវិញ។ ដើម្បីឱ្យរាងកាយ មានថាមពលខ្លាំងក្លាប្រយុទ្ធប្រឆាំងនឹងមេរោគគ្រប់ប្រភេទបាន ដំបូង អ្នកត្រូវហ្វឹកហាត់ធ្វើឱ្យរាងកាយអាចនៅស្ងៀមក្នុងរយៈពេលយូរ។ ហ្វឹកហាត់ទាញចិត្តឱ្យគិតពីខ្យល់ចេញចូលក្នុងខ្លួន។ ហ្វឹកហាត់សង្កេតពីរំញ័រ ចរន្ត នៅក្នុងខ្លួន។ ហើយអនុវត្តជាប្រចាំថ្ងៃ ពេញមួយជីវិត។ នោះគឺ “សមាធិ” !

សូមឈប់បំផ្លាញសុខភាពខ្លួនឯង បំផ្លាញសុខភាពមនុស្សក្នុងផ្ទះជាមួយ និងបំផ្លាញបរិស្ថាន ដោយសារផ្សែងធូបទៀតទៅ។ យើងមិនដែលឃើញអ្នកនិយមដុតធូបណា មានសុខភាពល្អទេ។

ដោយ លឹម វិរិយា 🌸