ពេលព្រឹកនឹកគ្នាណាត់ញ៉ាំគុយទាវ  ញ៉ាំហើយមាត់ភ្លាវក៏ថែមកាហ្វេ

ផឹកហើយជជែកមិនអស់ចិត្តទេ  នាទីកើនទ្វេជ្រេចូលប៊ុយរ៉ូ។

ថ្ងៃត្រង់បន្តក៏តេហៅគ្នា  កម្សាន្ត រមនាក្នុងព្រៃអង្គរ

ខាងត្បូងស្រះស្រង់ត្រង់ទួលពង្រ  ក្រោមសៀងភ្លៀងផ្គរបន្ទរស្រោបប្រាណ។

នារមណីដ្ឋាន ធម្មជាតិស្រះស្រង់  ពួកយើងកម្មង់អាហារច្រើនចាន

មានកង្កែបអាំងច្រងេងច្រងាង  ខ្យងសោកបោកប្រាណចំហុយទឹកដូង។

បុកល្ហុងឈ្ងុយឈ្ងប់អប់ក្លិនប្រហុក  មាន់ដុតក្នុងស្រុកចុកខ្លាញ់រលោង

មានទាំងស្លម្ជូរបង់ម្រះព្រៅយោង  បាយក៏ទំនង ដាំដោយស្រូវស្រូប។

ខ្យល់បក់ត្រសៀក ងាកមើលមុខគ្នា  រំភើយរងា ណាត់គ្នាថតរូប

កាច់រាងក្ងិកក្ងក់ ព្រោះខ្លាចមិនឃ្យូត  ថតរួចបោសគូថ ទើបបែកទីទៃ។

មិនទាន់ចប់ទេ មាសមេបងហ្អើយ  យប់ឡើងមិនស្បើយព្រោះពេលវាខ្លី

ណាត់ទៅឯស្ដង់ ក្នុងពេលរាត្រី  ពិពណ៌៤ថ្ងៃ នៅដីព្យុងយូ។

ជួយទិញអ្នកស្រុក ស្រែខ្មុក គ្នាយើង  ជួយគ្នាតម្កើង ឡើងឲ្យធារធូរ

ជួយទិញខ្មែរយើង កុំពោលរអ៊ូ  ជួយគ្នាកុំយូរ ស៊ូស៊ូ ទើបឈ្នះ!!!

ដោយក្ដីស្រលាញ់ពី លឹម វីរីយ៉ា

សៀមរាប, ថ្ងៃអាទិត្យ ៩រោច ខែពិសាខ ឆ្នាំវក អដ្ឋស័ក ព.ស ២៥៦០ ត្រូវនឹងថ្ងៃទី២៩ ខែឧសភា គ.ស ២០១៦