ទុកមុខទុកមាត់សមសួន
ទាស់​តែនឹមនួន​ ពួននៅម្នែងអ៊ាក់
សម្រាកសម្រាន្ត​ ក្សាន្ត​ជាក់
ខ្សត់ខ្សោយ​ក្រោយធ្លាក់
ខ្ជាក់​ពេចន៍​ពីពោះ។

ពោលពាក្យមិនសូវពីរោះ
អ្នកក្រអាងឈ្លោះ​ អ្នកងោះអាងងាប់
ម្នឹះល្ងង់លិចលង់ក្នុងទ្រព្យ
សម្បត្តិ​មិនគាប់​ ជាប់តែគុកកម្ម។

រស់នៅភ្លេចអស់បណ្ដាំ
គ្រូធំឱ្យចាំហេីយផ្ដាំឱ្យញឹក
ស្មោះត្រង់​ បង់បោយល្ងាចព្រឹក
ចម្រើន​បាយទឹក​ នឹកព្រះកន្លោង។

កន្លែង​បង្គងធ្លាប់តោង
ធ្លាប់​ទាំងត្រូវថ្មោង​ ព្រោះ​ផ្លោងសម្ដី
ផ្លេតផ្លាតមិនដឹងខ្យល់អី
ដឹងត្រឹមអាល័យថ្ងៃដែលអស់ខ្យល់។

ណ្ហើយ​ចុះ! កុំឱ្យច្របល់
ច្របាច់​ដាច់វ៉ល់​ ផលកម្មកៀករិត
រស់នៅខុសផ្លូវថែមងងឹត
ងងល់កំពិត​ គិតច្រើន​ច្រាស់​ច្រាយ។

រឿងតូចធំវែងអន្លាយ
អំបែងក្លែងក្លាយ​ ចាយលុយ​កក្លាក់
ខំលាក់បំបាំងក្រោយថ្នាក់
លុះធ្លាយប្រត្យក្ស ចូលធ្នាក់គួរខ្លាច។

ខ្ញុំ​រស់​សូមត្រឹមអំណាច
ការពារ​បិសាច​ ចេចចាចខុសរឿង
ណ្ហើយ​ចុះ! ឥលូវខ្ញុំសឿង
វាសនា​លែងគឿង​ រឿងខ្ញុំលែងកល់។
——–
លឹម​ វីរីយ៉ា​🌸
០២​ មករា​ ២០១៩

ជើងមេឃខាងលិច ច្បិចចង់ដង្ហោយ
បង្ហើបស្រើបដោយ ល្បោយរសឥតប្រែ
ល្បួងលួងដោយល្បិច ស្រិចៗគង់តែ
របូតបាត់ស្នេហ៍ ចែចង់បង់ស្នៀត។

ជើងមេឃពណ៌ខៀវ រងាវ ងូវៗ
រងំតាមផ្លូវ តម្រូវឲ្យបៀត
រដូវត្រជាក់ អ្នកអ៊ើយសូមឃ្លាត
រស់នៅមួយជាតិ ឆ្លៀតដើរមួយជុំ។

ជើងមេឃឥតខ្យល់ ខ្វល់ខ្វាយស្ដាយស្រុក
ស្រងែដុះជុក ទុកស្រូវឲ្យទុំ
ទំពាំងលាស់ត្រួយ ជួយឫស្សីគុម្ព
អ្នកអ៊ើយកុំយំ ខ្ញុំសូមលាហើយ។
———
លឹម វីរីយ៉ា🌸

ថ្ងៃពុធ ៦រោច ខែកត្ដិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ២៨ ខែវិច្ឆិកា គ.ស ២០១៨