ការនិយាយដើមគេ ចំអកសើចសប្បាយនឹងជីវិតអាស្រូវរបស់គេ ត្រេកអរនឹងគ្រោះកម្មអកុសលទាំងឡាយរបស់គេ ហើយលើកយករឿងអពមង្គលរបស់គេ មកនិយាយគ្នាជជែកវែកញែក ប្រកបដោយសេចក្ដីរីករាយ បីតិ ព្រមដោយការផ្ដន្ទាគេបន្ថែម នោះព្រះលោកហៅជា «តិរច្ឆានកថា»។

បុគ្គលឯណាដែលបរិភោគ តិរច្ឆានកថា ជាអាហារផ្លូវចិត្ត ប្រៀបដូចកំពុងវិនិយោគ កសាងផ្លូវសម្រាប់ខ្លួនឯង ឱ្យបានរអិលធ្លាក់ចូលទៅក្នុងអន្លង់អបាយភូមិ ដោយចៀសពុំរួចឡើយ។ កម្មអកុសលនេះ គឺជា «ទិដ្ឋធម្ម វេទនីយកម្ម» (Diṭṭhadhammavedanῑya-kamma) ជាកម្មទី១ ច្បងគេបង្អស់ ក្នុងចំណោមកម្មទាំង ១២ ដែលនឹងឱ្យផលក្នុងពេលបច្ចុប្បន្ន គឺក្នុងភពនេះ យ៉ាងទាន់ហន់ មិនរង់ចាំយូរ ដល់ជិតស្លាប់ ឬដល់ជាតិក្រោយទេ។

មនុស្សអាចធ្លាក់អបាយភូមិទាំងនៅរស់មានជីវិត ប្រសិនបើកម្លាំងកម្មនោះសន្សំមកច្រើនក្រាស់ ធ្ងន់ល្មមនឹងអាចទាញទម្លាក់បាន។ សម្រាប់អ្នកដែលបានទទួលផលបាបនាគ្រាបច្ចុប្បន្ន វាគឺជាការហុចផលនៃកម្មចាស់របស់គេដែលសាងមក។ ចំណែកអ្នកបរិភោគ តិរច្ឆានកថា អំពីផលបាបរបស់គេ គឺជាកម្មថ្មីរបស់ខ្លួនឯងដែលកំពុងសន្សំ។ សូមប្រយ័ត្ន!

វិរិយា 🌸