រឿងក្រោយឆាក

ជីវិតមនុស្សគ្រប់រូប សុទ្ធតែមាន #រឿងរ៉ាវក្រោយឆាក

សម្បករឿងខាងក្រៅដែលយើងមើលឃើញនៅតាមកញ្ចក់ទូរទស្សន៍ នៅលើឆាកល្ខោនសម្ដែង នៅក្នុងកំណត់ហេតុឯកសារ ឬខ្សែអាត់រូបភាព ក្នុងបណ្ដាញសង្គម អ៊ីនធើណិត មិនទាន់អាចបញ្ជាក់ពីសភាពពិតរបស់តួអង្គណាម្នាក់បានឡើយ។

មនុស្សខ្លះដែលយើងតិះដៀលថាអាក្រក់ជួជាតិ ប្រហែលជាមានជីវិតដ៏លំបាកវេទនាពីខាងក្រោយ។ មនុស្សខ្លះដែលយើងលើកសរសើរថាអស្ចារ្យរុងរឿង ប្រហែលជាមានតំណក់ទឹកភ្នែករាប់ម៉ឺនស្រក់ចុះជោកខ្នើយស្ទើរមិនលស់ពេល ក៏ថាបាន។ មនុស្សខ្លះដែលយើងឱនក្បាលគោរពស្ទើរតែក្រាបដល់ដី ប្រហែលជាតាមពិតទៅ គេនោះហើយជាជនបង្កប់ក្នុងការជិះជាន់ កេងប្រវញ្ច បោកប្រាស់ រំលោភបំពានមនុស្សដទៃទៀតរាប់លែងអស់ ក៏ថាបានដែរ។

ឃើញរូបរាង មិនស្មើបានហិតក្លិន បានដឹងក្លិន មិនស្មើបានភ្លក្សរសជាតិ បានភ្លក្សរសជាតិ មិនស្មើបានពិសោធគុណភាពក្នុងរសនោះឡើយ។ រសជាតិដែលនាំទៅដល់ការសង្គ្រោះ តែងតែល្វីងជូរចត់ដូចជាគ្រាប់ស្លែង ពិបាកលេបណាស់។ រសជាតិដែលផ្អែមត្រជាក់ ច្រើនតែនាំទៅដល់ភាពចុះខ្សោយនៃសុខភាពរាងកាយ ចិត្តគំនិត ស្មារតី និងប្រាជ្ញា។ ចាស់បុរាណប្រដូចទៅនឹង ស្ករ និង បណ្ដូលពេជ្រ។

ដូច្នេះហើយ ទើបបានជាបុគ្គលពាល រមែងចូលចិត្តយកភាពទន់ផ្អែមត្រជាក់ ធ្វើជាអន្ទាក់ សម្រាប់បោកបញ្ឆោតឱ្យគេជឿទុកចិត្ត រហូតដល់អាចប្រមែប្រមូលបាននូវលាភសក្ការៈផ្សេងៗពីអ្នកដទៃ ក្នុងការញាំងប្រយោជន៍ផ្ទាល់ខ្លួន។

គ្រប់យ៉ាង សុទ្ធតែមានរឿងពិតបង្កប់ពីក្រោយ!

——–

វិរិយា