បើសិនជើងមេឃនៅជិតដៃ
ម្លេះអស់អាល័យតាំងពីយូរ
បើសិនសមុទ្រមានរសជូ
ម្លេះខ្ជិលតស៊ូនាំសាំចិត្ត។
បើសិនព្រះខែក្ដៅដូចថ្ងៃ
ម្លេះសមដួងចៃថ្លៃលែងស្និទ្ធ
បើសិនសុរិយារះពីលិច
ម្លេះម្នឹះគ្មានល្បិចច្បិចប្រហារ។
បើសិនហ្វូងផ្កាយរះលើដី
ម្លេះជនប្រុសស្រីអស់ស្នេហា
បើសិនពេលយប់បាត់ចន្ទ្រថ្លា
នោះគេហៅថាខែរនោច។
❤ ❤ ❤
រាត្រីដែលសួរ គ្មានអ្នកស្ដី!
លឹម វីរីយ៉ា
ពីជ្រុងម្ខាងនៃផែនដី ក្នុងរាត្រីនៃថ្ងៃសៅរ៍
សូមគេងលក់ដោយកក់ក្ដៅ ផុតហ្មងសៅក្រៅយល់សប្ដិ។
ពីជ្រុងម្ខាងនៃស្រុកខ្មែរ ផ្ញើម្ចាស់ស្នេហ៍ថែចិត្តស្ងប់
សូមបានសុខណាសំណព្វ ចិត្តជាទ្រព្យផ្គាប់មង្គល។
ពីជ្រុងម្ខាងនៃសៀមរាប បេះដូងប្រៀបគ្មានកង្វល់
សូមយប់នេះបានស្កប់ស្កល់ គេងលក់ដល់ព្រឹកថ្ងៃរះ។
——
រាត្រីសុវត្ថិពី លឹម វីរីយ៉ា
យប់១៤កើត ខែពិសាខ ឆ្នាំវក ព.ស ២៥៦០
