ទំនាក់ទំនង ទំនាស់ជាប់ទង ទំនងឥតទាស់

ចម្ការទំនាប ដីទាបគេរាស់ ទំនើបឥតខ្ចោះ

ទាស់តែក្រោមមេឃ។

ប៉ផ្អាក់ប៉ផ្អើក ប៉ផ្អូចដូចត្អើក ប៉ផ្អើកចង់ដេក

ចម្ការដំណាំដាំ ដុះល្អពេក ត្រួយល្ពៅត្រួយចេក

ដេកចាំតែបេះ។

ប៉ាភ្លីប៉ាភ្លើ ដើមដុះខាងលើ មើលក្រោមសុទ្ធផេះ

អាចម៍គោមាន់ទា គឺជាចំណេះ អ្នកដឹងអ្នកចេះ

ប្រលេះបានក្លែម។

ប្រវេប្រវា ប្រវត្តិគេចារ រឿងតាសក់ផ្អែម

ចម្ការភោគផល សល់រហូតថែម ទុកជាបង្អែម

បិតតែមសាងឈ្មោះ។

ល្ពៅល្ពាក់ ពៅនាងកុំស្ទាក់ ទងធ្លាក់រង្គោះ

ទីណាសល់ដី ទីនោះសាងយស ទំនើងពេញពោះ

រស់បានដោយស្រួល។

ក្រវល់ក្រវាយ ព្រួយភ័យខ្វល់ខ្វាយ ឆ្ងាយពីដីទួល

ទំនាបលិចទឹក នឹកឡើងឆាបឆួល វ៉ល់ៗអួលៗ

ដួលងើបរាប់ភ្លេច។

_________

លឹម វីរីយ៉ា

ថ្ងៃអាទិត្យ ៨រោច ខែកក្ដិក ឆ្នាំជូត ទោស័ក ព.ស. ២៥៦៤ត្រូវនឹងថ្ងៃទី ៨ ខែវិច្ឆិកា គ.ស. ២០២០