ឆោមឆើតឆាយ ចាយសម្រស់ ស្រស់ប្រិមប្រិយ
គួរបេតី ស្ដីសាសង ល្បងសាសព្ទ
គួរពុំគួរ សួរឱ្យដឹង នឹងបានស្ដាប់
ពាក្យរ៉ាយរ៉ាប់ ចាប់សំនួន ចួនសំណើរ ។

ឆោមឆើតឆាយ ឆ្ងាយពីគ្នា ជាទម្លាប់
គន់គូររាប់ ជាប់វេលា ជាអន្លើ
ចំណងមិត្ត គិតៗទៅ នៅបណ្ដើរ
ម៉ោងហោះហើរ ដើរហិចហែល ឆ្វែលហត្ថា។

ឆោមឆើតឆាយ ស្ដាយវេលា គ្រាកន្លង
ចិត្តចាំចង ប៉ងចិចី ស្ដីចរចា
ចង់ជួបណាស់ ឆ្លាស់នាទី ស៊ីមាត្រា
ចែងចិន្ដា ប្រាថ្នាជួប ផ្គួបឆ្លងឆ្នាំ។

កូនមិត្តខ្ញុំ សូមណែនាំ ពាំពាក្យពេចន៍
មិនដែលគេច ក្ដិចចំណង ក្រងបំណាំ
តាំងពីតូច ដូចស្រមោល ដោលឡើងសាំ
មិត្តពាន់ឆ្នាំ ចាំជានិច្ច ភ្លេចមិនបាន។
——-
(បទពាក្យប្រាំបួន ចង្វាក់ពាក្យរណ្ដំ)

ដោយ លឹម វីរីយ៉ា🌸

ថ្ងៃចន្ទ ៥កើត ខែបុស្ស ឆ្នាំវក អដ្ឋស័ក ព.ស ២៥៦០ ត្រូវនឹងថ្ងៃទី២ ខែមករា គ.ស ២០១៧