កើតមួយជាតិ ធាតុមួយចាន បានឲ្យចាំ
ចាស់លោកផ្ដាំ ចាំកុំផ្ដាស់ ច្បាស់មានជោគ
ចង់ចរចារ ហារចីចី ស្ដីតាមលោក
ធម៌ត្រូវសូត្រ ហូតត្រូវធាតុ ជាតិនៅមុខ។
មុននឹងស្លាប់ ត្រាប់ពាក្យស្លោក ក្រោកតស៊ូ
ដេកកុំយូរ ធូរក្រោយតឹង ដឹងតែសុខ
ស្រុកសាន្តត្រាណ បានផុតត្រើយ ស្បើយតត្រុក
ខ្មែរនឹកស្រុក ខ្មុកពេញស្រែ ថែឲ្យស្រួល។
———
លឹម វីរីយ៉ា
ថ្ងៃអាទិត្យ ៧កើត ខែស្រាពណ៍ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ៣០ ខែកក្កដា គ.ស ២០១៧
ឱ! ដីស្រុកខ្មែរ ខ្ញុំសូមរស់ដែរ
កុំតែបន្ទោស សូមតែមួយដុំ
ផ្គុំទុកបញ្ចុះ ឲ្យគេឆ្លាក់ឈ្មោះ
ដាក់ជួសមុខផ្នូរ។
———
លឹម វីរីយ៉ា
🌸
ថ្ងៃសៅរ៍ ៩កើត ខែជេស្ឋ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ០៣ ខែ មិថុនា គ.ស ២០១៧
ថ្ងៃនេះបងយ៉ាញ៉ាំមី 
🍜
អាហឹរប្រាំពីរជំនាន់ដូនតា
ពីរនាក់អូនលក្ខិណា
និយាយពីថា វាហឹរស្រិចស្រក់
ទឹកភ្នែកបងយ៉ាហូរដក់
ធ្លាក់ឮតក់ៗ ស្រក់ជោគភក្ត្រា
😓
ឃ្លានពេកក្រពះឡើងផ្សា
ញ័រទាំងហត្ថា ឆ្លេឆ្លាផ្លុំហុត
មួយភ្លែតអាឃ្លានទៅផុត
ចូលវគ្គស្រយុត ស្លុតស្លុងដួងចៃ
😢
ព្រោះខ្ជឹលញ៉ាំបាយពីថ្ងៃ
ដល់ល្ងាចលោភឆី មានអី? លេបថ្នាំ!
💊
ពេទ្យតឿនមិនដែលចេះចាំ
អារឿងឃ្លានញ៉ាំខុសម៉ោងខុសផ្លូវ
🕚
🕞
ថែមម្ទេសហឹរឆេះសន្ធៅ
🔥
ដល់តែអីចឹងទៅ សូវដេកស្រណោះ
😷
ទ្រាំឈឺមុខឡើងចង់ខ្សោះ
😰
ញញឹមក្រៀមក្រោះ បង្ហោះហ្វេសប៊ុគ(1)
😬
សន្យាខ្លួនឯងថ្ងៃមុខ
ឈប់សន្សំទុក្ខ អារឿងច្រំដែល
ពីរនាក់ប្រហាក់ប្រហែល
ក្រពះក្រវ៉ែលចង់រត់ចេញក្រៅ
ដោយសារអាហារសែនក្ដៅ
🍲
ទម្លាក់ចូលទៅក្រហល់ក្រហាយ
ពីរនាក់អោបពោះខ្វល់ខ្វាយ
ម្នាក់ព្រោះឆីស្វាយ ម្នាក់បាយខុសម៉ោង
នាំគ្នាអង្គុយចំកោង
អ្នកបាយខុសម៉ោង តោងអ្នកឆីស្វាយ
សូមស្លេះឈប់អភិប្រាយ
សូមសម្រាកកាយ ស្ដាយម៉ោងសុបិន
😴
យប់ហើយណា៎ខ្ញុំគេងសិន
ឱ្យក្រពះកិន កំដរដង្ហើម
😣
ចាំស្អែកបើកភ្នែកជ្រែកផ្ដើម
ចាំរកពេទ្យឆ្នើម
💉 ព្យាបាលតាមក្រោយ!
——-
(1) បានសរសេរបង្ហោះហ្វេសប៊ុគ មុនមួយថ្ងៃ
លឹម វីរីយ៉ា🌸
០២ មិថុនា ២០១៧
ទឹកជ្រោះគោះថ្មរណ្ដំ
កាទៀងភិរម្យ ចាអ៊ុងដួងចិត្ត
កាចាញ ត្រជាក់អម្រឹត
គង្គារហៀស្និទ្ធ ផ្ដិតហូរសង្ឃឹម។
💦
ទឹកធ្លាក់ខ្ជាក់សូរឥតផ្ទឹម
ឦសានព្រលឹម ប៉ប្រឹមភូមិគ្រឹង
បានលុង គង់វង្សដល់ម្លឹង
ចារ៉ាយស្លៀកប៉ឹង ឯបឹងយក្ខឡោម។
🌳
កូនម៉ុម អូរជុំ ឆើតឆោម
⛲
កម្សាន្តប្រឡោម ឯអណ្ដូងមាស
🚏
ជ្រោះអូរយ៉ាដាវ ហូរវាស
🎋
បរកែវចែវចៀស ក្បៀសដល់តាតតៃ។
🎑
ទេសភាពល្អស្រស់ពេកក្រៃ
🌻
លំផាត់ម្ចាស់ថ្លៃ ដែនដីខ្មែរលើ
🌺
វ៉ើនសៃក្រមុំជំទើរ 
👰
ពួនក្នុងខ្ទមឈើសង់ខ្ពស់ផុតដី។
🏡
ឯឡាបានសៀកអាល័យ
🌄
សាយណ្ហល្ងាចថ្ងៃ វិលវៃបឺតស្រា
🍶
ក្បែរបឹងកន្សែងស្នេហា
🌿
ស្អែកទៅពេជ្រាដា ទស្សនាជ្រោះធំ។
🌲
នៅអូរស៊ីនលែរត្រសុំ
🍁
ត្រសាយខ្ចាយជុំម៉ុមរឭកហួស
ទន្លេស្រែពកជ្រកឈ្មោះ
🌅
ខណ្ឌចែកបែកយស យកឈ្មោះកោះញែក។
🗻
អនុស្សាវរីយ៍ល្អឯក
😋
ថតរូបស្រស់ប្លែក អល់អែកអៀនអន់
😜
ទុករូបឡើងឆ្លងជំនាន់
🍃
ឭសៀងផ្គរលាន់ បន់ទៅម្ដងទៀត។
🍂
រតនគីរីមានជាតិ
🌱
ដីស្អិតមិនគ្រាត ឃ្លាតយូររឭក🌿
ទេសចរអំណរឡើងភ្លឹក
😘
ឆ្ងាញ់ទាំងបាយទឹក នឹកណាស់ម្ចាស់ស្រុក!!!
😇
———
លឹម វីរីយ៉ា🌸
ថ្ងៃព្រហស្បតិ៍ ៧កើត ខែជេស្ឋ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទិ ០១ ខែមិថុនា គ.ស ២០១៧
រលឹមស្រិចស្រក់ កង្កែបយំក្ដក់ ភ្លៀងស្រក់លើ-ទ
តែក្ដៅមួយពែង ដង្ហើមដកវែង ហត់រែងពុទ្ធោ
សំណាងមានទឹក គេថែមជូនផឹក ក្លែមសន្ធឹកផ្គរ
ជីវិតត្រចះ ត្រចង់ពេកណាស់ ច្បាស់ជាវឹកវរ
ឥលូវខ្លួនមួយ រងោករងួយ ជួយមិនដែលថ្ងូរ
ដេកដើរថ្មើរឈរ និយាយមិនភរ មិនយកលុយទេ!
———
កំណាព្យបទកាកគតិ ក្លាយចូលចង្វាក់ Rap
ដោយ លឹម វីរីយ៉ា🌸
រឿងពិតស្រីពៅ នៅក្រោមមេឃ
ចាំងល្អភ្លឺផ្លេក ជ្រែកផែនដី
ចិញ្ចែងចិញ្ចាច សាចរង្សី
ដូចពេជ្រចរណៃ ច្នៃជីវី
💕
រឿងពិតស្រីៗ ន្យាយមិនអស់
ឆើតឆាយឆោមស្រស់ ខ្សោះធរណី
ឆព្វណ្ណដូចមាស ពាសពេញទី
ពណ្ណរាយដូចមុនី ឆវីវណ្ណ
✨
💫
លឹម វីរីយ៉ា🌸
អាណិតខ្លាំងណាស់ ម្ចាស់ថ្លៃអ៊ើយ
ខំស្កាត់ឆ្លងត្រើយ ដង្ហោយស៊ូ
ស្ពាយយកកិច្ចការ ប្រាថ្នាគ្រូ
ស៊ីញេមិនយូរ ធូរចិត្តម្លេះ។
សិស្សនៅសៀមរាប ប្រៀបឆ្ងាយក្រៃ
អ្នកគ្រូម្ចាស់ថ្លៃ ដីឯណេះ
ការងារបន្ទាន់ ស្លន់ស្ទើរប្រេះ
តាំងចិត្តដល់ម្លេះ ច្នេះអស់ខ្វល់។
គាត់ឈ្មោះស្រីអូន កូនសិស្សខ្ញុំ
មិននៅច្រិមច្រុម សូមបន្ទាល់
ដឹងគ្រូរវល់ ទល់រចល់
ស្រូតហោះច្រាសខ្យល់ ដល់ទាន់ចិត្ត។
ការងារសារណា ខ្វះត្រាគ្រូ
គេតឿនកុំយូរ ជូរចត់ស្អិត
ខលតាមទូរស័ព្ទ ប្រាប់ការពិត
រៀបរាប់ជាប់ក្រិត្យ គិតមិនចេញ។
ខ្ញុំក៏ប្រាប់ទៅ នៅកុំស្មុគ
បើស្មាញក្រាញទុក្ខ មុខរមិញ
ដោះស្រាយការងារ លាមិនចេញ
ថ្ងៃលិចវិលវិញ តាមសម្រួល។
ស៊ីញេរួចហើយ ឆ្លើយអរគុណ
ប៉ុន្មានថ្ងៃមុន គន់គូរជ្រួល
ឆោឡោក្នុងក្រុម ខ្ញុំក្ដុកក្ដួល
ឥលូវធូរស្រួល បបួលសើច។
គ្មានទេពាក្យ “ទ័ល” កល់ភពមនុស្ស
សាងចិត្តមុតធ្លុះ គូសសំណើច
ឈប់ធ្វើសញ្ជឹង ធ្មឹងនាំខើច
ហ៊ានឈ្នះបញ្ចើច ស្ងើចជីវិត។
———
លឹម វីរីយ៉ា
៣១ ឧសភា ២០១៧
ស្រណោះក្រោយភ្លៀង សៀងចង្រិតយំ
ច្រេចច្រាចរងំ សូមជ្រកគុម្ពស្មៅ
ពពេចលាក់ពង យោងក្រោមមែកស្ដៅ
ត្រយ៉ងបូលហៅ តាវ៉ៅបូលឆ្លើយ។
ពីជើងមេឃម្ខាង យ៉ាងមានក្ដីសុខ
ភ្លៀងស្រក់តិកតុក ស្រុកខ្មែររំហើយ
ស្អែកដាច់ខែចេត្រ ខេត្តក្រុងប្រុងស្បើយ
ពិសាខដល់ហើយ ឆ្លើយប្រាប់អ្នកស្រែ។
———
លឹម វីរីយ៉ា
💐
ថ្ងៃអង្គារ ១៤រោច (យប់នេះដាច់ខែចេត្រ ស្អែក ១កើត ខែពិសាខ) ឆ្នាំរកា នព្វស័ក ព.ស ២៥៦០ ត្រូវនឹងថ្ងៃទី ២៥ ខែមេសា គ.ស ២០១៧
ដំណើរផ្សងពេ្រង រែងឫក្ស នឹករឿងដើម
ខំទប់ដង្ហើម ផ្ដើមគិត ចិត្តក្ដុកក្ដួល
លើផ្លូវវែងឆ្ងាយ មិនស្ដាយ ក្លាយប្រែប្រួល
ឈឺឆៀបអួលៗ មិនស្រួល រមួលគ្រេច។
ដំណើរកាត់ព្យុះ លុះលង់ ស្ទង់ស្ទាបមើល
មិនហ៊ានងងើល ព្រើលព្រួល ឆួលព្រិចៗ
ភ្លៀងពេលរាត្រី សត្វរៃ ភ័យលង់លិច
ស្រែកច្រៀងតិចៗ បំភ្លេច ភាពឯកា។
ដំណើរវែងឆ្ងាយ ចាយពេល វេលាយូរ
រស់ទាំងតស៊ូ ជូរចត់ កត់សន្យា
សច្ចៈជាទ្រព្យ ផ្គាប់ព្រះ រះភ្លឺថ្លា
ឈ្នះម្នឹះឫស្យា ទេវតា ប្រទានពរ។
———
លឹម វីរីយ៉ា
ថ្ងៃសៅរ៍ ៩កើត ខែជេស្ឋ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ០៣ ខែ មិថុនា គ.ស ២០១៧
រសាប់រសល់ ខ្វល់គិត
ឆ្ងល់រឿងអតីត គិតទៅខ្លោចផ្សា
ផ្លូវដើរសុទ្ធតែបន្លា
ក្រពើត្រៀបត្រា ខ្លាតោគ្រហឹម។
ធ្លាប់ដើរទាំងអស់សង្ឃឹម
ឥលូវព្រលឹមផ្ទឹមសាយព្រលប់
ទោះថ្ងៃសាយណ្ហទាន់យប់
មិនសូវជ្រុលជ្រប់ងប់តាមគេថា។
រឿងរ៉ាវទោះធ្ងន់ម្ដេចម្ដា
គង់មានទេវតាអាសាតាមថែ
រស់រានមានមិត្តហូរហែ
វាធូរចិត្តដែរ តែមិនសូវហ៊ាន។
សព្វថ្ងៃគេរាប់អ្នកមាន
មិត្តភក្ត្រព្រៀងលានឈានចូលបូលមុខ
ពីនេះតទៅថ្ងៃមុខ
រួមសុខរួមទុក្ខផ្ទុកដាក់ខ្លួនឯង។
តាំងឈ្មោះជួសឱ្យបែកផ្សែង
ផ្លាស់ប្ដូរមិនក្រែងចែងចាំងពណ្ណរាយ
រំកិលទៅទាំងសម្ពាយ
វេចខ្ចប់អប់ភាយលាយឡំផ្សំចិត្ត។
ម្នឹះលោកបើសិនប៉ិនស្និទ្ធ
ត្រកាលអម្រឹតដិតដោយបោយដៃ
បើព្រហ្មលិខិតចង្រៃ
ថ្លើមធំប្រល័យ ខ្ញុំក្ស័យឱ្យមើល។
តែណ្ហើយ! នៅឡើយអ្នកព្រើល
ងងល់ងងើល មើលសឃើញខ្មៅ
ជននោះពិតជាកម្លៅ
បើគិតៗទៅសូវបែកល្អជាង។
រស់ជួបដូចខួបដីផ្អៀង
ខែរះមិនទៀងភ្លៀងធ្លាក់មិនត្រូវ
ណ្ហើយចុះ! អតីតខុសផ្លូវ
តែថ្ងៃនេះទៅ សុខហង ជ័យអ៊ើយ!
———
(បទភុជង្គលីលា)
ដោយ លឹម វីរីយ៉ា
🌸
ថ្ងៃពុធ ១៤កើត ខែបុស្ស ឆ្នាំវក អដ្ឋស័ក ព.ស ២៥៦០ ត្រូវនឹងថ្ងៃទី១១ ខែមករា គ.ស ២០១៧
Viriya Lim's Blog 