អំបុកចេកទុំ ភ្ងំលាយដូងខ្ចី
ធូបបីសរសៃ ក្នុងស្បៃងងឹត
ទៀនតូចពីរដើម ផ្ដើមបំភ្លឺចិត្ត
សន្សើមអម្រឹត ផ្ដិតទឹកភ្នែកអូន។
ងើយមើលដួងខែ ក្បែរទ្វារមុខផ្ទះ
ហ្វូងផ្កាយខំរះ ស្ទះពន្លឺសូន្យ
ពពកក្រោមមេឃ ដេកចាំផ្ដាំកូន
ភ្លើងទៀនក្បែរដូង យោងអធិដ្ឋាន។
_______
លឹម វីរីយ៉ា
រាត្រី១៥កើត ខែកត្ដិក ព.ស ២៥៦០
មើលមេឃងងឹត គិតរឿងមមៃ
មមើពីថ្ងៃ ស្រម៉ៃប្រញឹក
ស្រមេមស្រមាម ដាមគ្នារដឹក
រំដួលលិចទឹក នឹករំដេងព្រៃ។
🌱
មើលពពកខ្មៅ ក្រៅបង្អួចឈើ
អាលេអាលើ ភ្នែកស្លឺអាល័យ
អន្លង់សុបិន ឆ្អិនឆ្អៅដៅន័យ
ស៊ូរស់សព្វថ្ងៃ កំដរចក្រវាល។🌍
រាត្រីសុវត្ថិ បាត់អ្នកសួរ សល់តែអ្នកចាំឆ្លើយ! 🌛
លឹម វីរីយ៉ា
យប់៦កើត ខែកត្ដិក ២៥៦០
រាត្រីសុវត្ថិ បាត់សៀងចង្រិត
ធ្លាប់ច្រៀងលួងចិត្ត ច្រេកច្រិតស្និទ្ធស្នេហ៍
បាត់ទាំងហ្វូងផ្កាយ ឆ្ងាយទាំងដួងខែ
ឥលូវសល់តែ តុកកែឯកា
រាត្រីចង់សួរ តួឯកបាត់ខ្លួន
យប់យន់អង្រួន ពួនគ្មានវាចា
រាត្រីសួស្ដី ស្ដីសួរនរណា
ដួងចន្ទ្រតារា យាត្រាក្រៅមេឃ
ដោយ លឹម វីរីយ៉ា
យប់ថ្ងៃទី៤ ខែវិច្ឆិកា គ.ស ២០១៦
រងាផ្កាគ អូនឈរនឹកម៉ែ
ស្រណោះស្រុកខ្មែរ ដើមខែកត្ដិក
រដូវចម្រូត ច្បូតស្រូវរអឹក
វាលស្រែក្បែរទឹក នឹកដល់រឿងដើម។
រងាផ្កាចារ ហារស្ដីមិនរួច
ជំនោរបោកគួច ព្រួចទឹកសន្សើម
កណ្ដាលរាត្រី ស្រីព្រួយសម្បើម
ខំដកដង្ហើម ឆ្អើមភពមរណា។
(ដោយ លឹម វីរីយ៉ា)
ភ្លៀងធ្លាក់ចុងឆ្នាំផ្ដាំស្រុកខ្មែរ
ថ្ងៃស្អែកដាច់ខែប្រែ-កត្ដិក
ផ្គរលាន់ពេលយប់ខ្ទប់ដល់ព្រឹក
ឥន្ទធនូឆ្លងទឹក ស្ពឹកវេហា។
ពពកដេរដាស ប្រាសលើភ្នំ
ចង្រិតស្រែកយំ ឃ្មុំក្រេបផ្កា
កណ្ដូបបុកស្រូវ ផ្លូវមរណា
តុកកែចរចា ហាឱ្យបូល។
កង្កែបអូបៗ ទ្រោបក្នុងស្មៅ
លបហួចហិចហៅ ដៅមូសចូល
មមាចពភ្លើ ធ្វើជាស្នូល
បណ្ដែតបណ្ដូល បង្គោលកម្ម។
ក្រពើឆ្លេឆ្លា ប្រវាគោក
សន្ធឹកភ្លៀងមក ជោគសស្រាំ
រណ្ដំស្រិចៗ ក្ដិចរអាំ
វស្សារយឆ្នាំ ចាំរដូវ។
ចាបលើចុងឈើ ស្លឺស្លន់ស្លោ
អាស្វាឥតខោ តោនាំផ្លូវ
ក្រសាររវល់ ខ្វល់លំនៅ
ឯហ្វូងដង្កូវ នៅតែខូច។
អ្នកប្រាជ្ញស្រុកខ្មែរ បែរលាក់មុខ
ជនពាលឃ្វាលទុក្ខ រុកប៉ផ្លូច
អ្នកចេះធ្វើភ្លើ ស្ទើរធំតូច
ឯពួកអាខូច ដូចស្វាព្រៃ។
បួងសួងលួងព្រះ សំពះផ្កាយ
ភ្លើងទៀនខ្ចាត់ខ្ចាយ ឆ្ងាយបារមី
សង្ឃឹមទេវតា ត្រាប្រណី
យល់អធ្យាស្រ័យ ព្រះអាទិត្យ។
———
ដោយ លឹម វីរីយ៉ា (រក្សាសិទ្ធិ)
សៀមរាប,
ថ្ងៃអាទិត្យ ១៤ រោច ដាច់ខែអស្សុជ (ស្អែកចូលកត្ដិក) ឆ្នាំវក អដ្ឋស័ក ព.ស ២៥៦០ ត្រូវនឹងថ្ងៃទី៣០ ខែតុលា គ.ស ២០១៦
វាយោយោលយោគ រលកទឹក
💦
ផ្គរលាន់គគ្រឹក រអ៊ឹកផង
⚡
រន្ទះក្ឌុងក្ឌាំង ភាំងក្ដាមខ្យង🐌
កង្កែបហែលឆ្លង ផ្សងខ្លាចឈ្លើង។
🐛
ដើមត្រែងលាស់ត្រួយ ជួយកន្ត្រើយ🌱
កន្ទ្រាំងខែត្រស្បើយ ត្រើយខាងជើង
ចង្រិតខំពួន ជួនឃើញភ្លើង
🔥
រំភើបពើតពើង ពេញពោងពាយ។🙊
កំប្លោកក្នុងបឹង ប្រឹងបែកគុម្ព🌿
កំភ្លឹងឆួលងំ សណ្ដំភាយ
អណ្ដើកបាតទឹក ស្ពឹករវាយ
រវើស្ទើរធ្លាយ រលាយជុំ។🐢
កញ្ឆែតបោះទង រំលងទឹក
ត្រីក្រាញ់សងសឹក ចឹកកូនគ្រុំ
🐚
ដូចជាផែនដីនៃនាងខ្ញុំ
រង្គើរង្គុំសូមរួមកាត់។
🙏
———
ដោយ លឹម វីរីយ៉ា
———
ថ្ងៃសៅរ៍ ១៣រោច ខែអស្សុជ ឆ្នាំវក អដ្ឋស័ក ព.ស ២៥៦០ ត្រូវនឹងថ្ងៃទី២៩ ខែតុលា គ.ស ២០១៦
សូមណែនាំជូនសម្លាញ់ចាស់
សប្បាយចិត្តណាស់បានជួបគ្នា
ឆីបាយថ្ងៃត្រង់ផ្ចង់វេលា
ហើយប៉ាវពំងាជាមិត្តភាព
អរគុណពួកម៉ាកស្លាកកម្លោះ
គ្នាសូមបង្ហោះចែកជូនញាតិ
ក្រែងមានស្រីណាចង់ទៅបៀត
នឹងអាលស្គាល់ជាតិគូដូចគេ
រូបភាពរីករាយលាយសំណើច
មិត្តខ្ញុំគេសើចខើចកាហេហេ
ព្រោះសប្បាយចិត្តត្បិតអ្នកម៉ែ
ខ្សឹបឮក្បែរៗ នែ៎ៗ! ជិតបានប្រពន្ធ
😜
😂
😆
ភ្នំពេញ ថ្ងៃទី ២៨ តុលា ២០១៦
-ពីក្រោយខ្នងខ្ញុំមានបួននាក់
សូមមើលឲ្យជាក់ហើយចាំស្ដាប់
ខ្ញុំនឹងរៀបរាប់តាមលំដាប់
ខ្លាចមិនបានប្រាប់នាំស្ដាយក្រោយ។
-ម៉ាក់យាយសែនឆ្លាតឱហាតក្រៃ
រហស្សនាមយ៉ាងល្បីយាយផ្ដល់ឲ្យ
ចាស្ម៊ីន ខេស៊ី (១) មាំមិនខ្សោយ
មានចៅពីរហើយសុទ្ធស្រីស្អាត។
-គាត់ពាក់វ៉ែនតាចុច iPad
កំពុងតែច្បេតតែងកំណាព្យ
អោបចៅបណ្ដើរមិនឲ្យខាត
យោលនាងពៅស្អាតមិនឲ្យព្រួយ។
-ថ្លែងពីនារីភ្លីសក់ក្រាស់
ភ្នែកលឹបឃើញច្បាស់ដូចអាមួយ
អង្គុយអានសៀវភៅជាភូឈួយ
បកប្រែរឿងមួយជូនយាយសិន។
-គាត់ឈ្មោះសុភាព ត្រកូលចេន(២)
បើរាប់មែនទែនពូជកូនចិន
ប្រសព្វចំណាប់ប៉ិននុះប៉ិន
រកស៊ីកាច់កិនសន្សំលុយ។
-ក្រឡេកភ្នែកមើលក្នុងអង្រឹង
ចៅតូចព្រលឹងកំពុងងុយ
បិទភ្នែកគេងលក់ខ្ជិលដេញរុយ
ម៉ាក់យាយអង្គុយយោលបំពេ។
-នៅផ្ទះយាយម្លិះសប្បាយណាស់
ខាងលើស្រឡះវាលទំនេរ
ខ្យល់បក់ប៉ីប៉ីល្ហើយម្លេះទេ
សំយ៉ាប-លយទេរម្ខាងផ្សារផ្សោ។
-បើមានឱកាសនឹងទៅទៀត
បានរាប់ជាញាតិមិនឯកោ
ទម្រាំចៅធំយាយឡើងសោ (៣)
គិតទៅគិតមក ឱ! ជីវិត។
-សូមស្លេះសិនចុះក្រែងគេជិន
សរសេរបង្ហិនតែរឿងពិត
ទុកខ្លះកុហកថ្ពក់ស្នេហ៍ស្និទ្ធ
និស្ស័យកៀកស្អិតពិតជួបទៀត។
——
ដោយ លឹម វីរីយ៉ា
សៀមរាប ថ្ងៃព្រហស្បតិ៍ ទី១៥ ខែកញ្ញា គ.ស ២០១៦
(១) Jasmine Kc
(២) Sopheap Chen
(៣) សោ = ហត់នឿយអស់កម្លាំង
បើព្រះអាទិនករ ឈប់រៀងរះ
ចន្ទ្រានឹងឈ្នះភពរាត្រី
អាចបំភ្លឺមនុស្សក្នុងលោកីយ៍
មិនពឹងរស្មីនៃសូរិយា។
បើសិនផ្កាយព្រឹកពេលព្រលឹម
បែរអស់សង្ឃឹមឈប់យាត្រា
ច្បាស់ជាផែនមេឃញែកតារា
ទោះហ្វូងទេវតាក៏គង់ក្ស័យ។
បើសិនសមុទ្រប្រែរសផ្អែម
មនុស្សលោកនឹងថែមជំងឺថ្មី
ពេលនោះព្រះព្រហ្មអស់ខន្តី
រំលាយផែនដីអាសារបង់។
ច្នេះហើយរស់នៅត្រូវគិតគូរ
សាងបុណ្យកុំយូរគ្រូតម្រង់
ជីវិតនៃមនុស្សរស់រញ៉ង់
ខ្លីណាស់កុំចង់ផ្ចង់អធម្ម។
បួងសួងសម្រួងលួងដោយស្មោះ
សូមបានផុតអស់ ខ្ទាស់បន្ត
នូវពរជោគជ័យ ជាអំណរ
ដង្ហើមសាទរ តែពាក្យឈ្នះ!
———
ដោយ លឹម វីរីយ៉ា
ថ្ងៃអង្គារ ទី១៣ ខែកញ្ញា គ.ស ២០១៦
រំឭកបន្តិច ច្បិចរឿងមួយ
រឿងបាយជាមួយ អូនលក្ខណា
គាត់នាំទៅប៉ាវ ហាងហ៊ឺហា
រសឆ្ងាញ់អស្ចារ្យ អាហារជប៉ុន។
មានទាំងស៊ូហ្ស៊ី មីសួភ្លោះ
ត្រីស្រស់ង៉នហួស ឈ្មោះសាលម៉ុន
បង្គាមឹកឆៅ ក្ដៅអ៊ុនៗ
ថែមបន្លែទន់ មន្ដស្នេហ៍មាត់។
ញ៉ាំឆ្អែតឡើងហល់ សល់តែចាន
អស់លុយប៉ុន្មាន ខានគិតធាត់
ទៅហាងមួយទៀត ឆ្លៀតមិនហត់
ឆាកកំដរមាត់ ហាងទីពីរ។
គេមានការ៉េម ថែមផ្លែដូង
ទឹកកកឈូសយោង ទឹកដូងហ្វ្រី
ទឹកស្ករត្នោតខ្មែរ ថែប្រពៃណីយ
ញ៉ាំដល់ម៉ោងពីរ វីវក់ក្រៃ។
អរគុណពន្លឹក នឹកដល់ម្ចាស់
មួយពេលឌុបក្រាស់ បះសក់ថ្លៃ
លក្ខណ៍ហ្អើយ! បងយ៉ាហល់ទាំងថ្ងៃ
លេបទាំងភិតភ័យ ឆីយ៉ាងហ្នឹង!!!
សូមផ្ញើផុសត៍នេះពីចម្ងាយ
ជូនស្រស់ឆោមឆាយ ក្លាយដំណឹង
ក្រែងចាំមើលផ្លូវ ពៅស្ងាត់ឈឹង
រវល់ម្លឹងៗ នៅតែប្រឹងឆ្លៀត។
——
ពី លឹម វីរីយ៉ា
សៀមរាប
ថ្ងៃសៅរ៍ ទី១០ ខែ កញ្ញា គ.ស ២០១៦
Viriya Lim's Blog 